animisha

మీలో నే చూసాను ఓ అందమైన స్వప్నం

అందులో విహరించి తెలుసుకున్నాను జీవన మాధుర్యం.

ఆ స్వప్నం నుంచి విడివడిన వేళ

ఏకాంతమైన మీ జీవన వీణని చూసి

చలించాను అనునిత్యం .

నిదురలేని నిశీధి రాత్రులలో మీరలమటిస్తుంటే

తిరిగి రాలేని ఆ సుదూర తీరాలకు, ప్రయాణించి మరీ

అతనిని తీసుకు రావాలనిపిస్తుంది.

అందుకే అతనిని వెతుక్కుంటూ బయలుదేరాను .

అతను నాకు సుపరిచితమే..

మీ మనసు పుస్తకంలో అతనిని చదివాను .

మీ కళ్ళ వెనుక దాగిన కన్నీటిలో అతని రూపాన్ని చుసాను .

మీ స్మృతి పారవశ్యపు దరహాసంలో ,

అతని మనసు లాలిత్యాన్ని అనుభవించాను.

అతని గురించి చెబుతున్నప్పుడు

మెరిసే మీ కళ్ళ మెరుపులో

అతని ఔన్నత్యాన్ని గుర్తించాను.

కానీ , అతనిని కలుద్దామని వెళ్ళిన నాకు నిరాశే మిగిలింది.

ఎంతో గాలించాను,

మరెంతో శోధించాను.

అయినా అతని జాడ ప్రశ్నార్ధకం.

నిరుత్సాహంతో , నిస్సత్తువతో ,నిర్జీవంగా ,

తిరిగివచ్చిన నాకు ,

మిమ్మల్ని చూడగానే

తన ఉనికి అవగతమైంది.

మీ ఉచ్వాస నిచ్వాసల్లో

సమాగమమై...

నిశ్చలంగా ,నిజరామరంగా,నిలిచి ఉన్నతనను ,

బాహ్య ప్రపంచంలో ఎక్కడ వెతుకుతున్నావ్ అంటూ

చిలిపిగా ప్రశ్నిస్తూ కనిపించాడు ,

"తను "

మీలో మమేకమై...